„Ќе започнеме сериозен проект од првиот ден за уредување на фасадите на сите згради во стариот Чаир. Ова не е само прашање на естетика, туку и прашање на енергетска ефикасност. Нова фасада значи и нова термоизолација, што ќе ги намали трошоците за греење во зима, а во лето ќе го заштити животниот простор“, вети кандидатот за градоначалник на Општина Чаир, Бујар Османи, на денешната прес-конференција
Османи истакна дека како поранешен национален координатор за европски фондови, добро ги познава работите во оваа сфера и веќе има формирано професионален тим што ќе работи на подготовка на проекти.
„Врз основа на сите анализи што ги направивме, ова се проекти кои Европската Унија ги поддржува финансиски, пред сè поради енергетската ефикасност и заштитата на животната средина. До 85% од трошоците за вакви проекти можат да се обезбедат преку европски фондови, а останатите 15% ќе ги покрие општината“, рече Османи и додаде дека од милијардите евра што и биле достапни на Северна Македонија, Општина Чаир во изминатите 20 години искористила нула евра, затоа што не подготвувала проекти и немала стручни луѓе кои знаат да работат на такви проекти.
Реновирањето на фасадите и зачувувањето на стариот дел од Чаир ќе биде приоритет, истакна Османи и уште еднаш повтори дека овој дел ќе биде целосно заштитен и нема да бидат дозволени повеќе дивоградби.
Тој најави три итни приоритети што би стартувале веднаш по преземање на функцијата: масовно чистење на општината, механизам за борба со корупцијата и забрзано решавање на сите постапки за легализација.
Османи постави јасни рокови. За хигиената и јавните површини рече дека во првите 100 дена Чаир мора да биде исчистен:
„Ако во првите сто дена не го исчистам Чаир, нема да продолжам понатаму.“ Оваа точка ја нарече „најлесна, но најважна“ бидејќи директно го погодила секојдневието на жителите.
Вториот столб е антикорупциски механизам „без компромиси“. Османи најави нулта-толеранција во ист период од 100 дена: „Ако во првите сто дена не ја сведам корупцијата на нула, нема да продолжам понатаму.“ Не наведе детали, но ја истакна потребата за јасна процедура и проверливи траги за секоја одлука на општината.
Третиот приоритет се дивоградбите и легализациите. Најави итни активности за расчистување на предметите и заштита на купувачи што биле измамени при купување станови. Клучниот рок е шест месеци:
„Ако се појави папка за легализација што стои во фиока за уцени пред избори, нема да продолжам понатаму. Ќе ги решиме сите барања.“
Османи ја врза понудата со лична одговорност и досегашни функции, наведувајќи дека секоја задача ја завршувал „со резултати“.