Во Нови Сад, граѓаните од раното утро носат цвеќе и палат свеќи пред железничката станица, на местото каде што пред една година се случи трагедија во која загинаа 16 лица, меѓу кои и деца. Споменот на овој настан предизвикува силни емоции во градот, а пред станицата цел ден се собираат граѓани, студенти, активисти и семејства на жртвите, кои со тишина и солзи оддаваат почит.
Комеморацијата, која се одвива под слоганот „16 минути тишина за 16 животи“, симболично го претставува моментот кога настрешницата се урнала, а денес е претворен во момент на солидарност и колективна болка.
Меѓу присутните беа и претставници на локалните организации и активисти кои минатата година ја започнаа иницијативата за одговорност на институциите и санкционирање на виновните, бидејќи по една година, истрагата сè уште не е завршена, а обвиненијата против поранешни функционери и изведувачи на реконструкцијата сè уште се разгледуваат.
„Ова не е само чин на сеќавање – ова е повик за правда,“ изјави за Beta.rs еден од студентите кои пешачеа до Нови Сад кон комеморацијата.
Сцените од местото покажуваат редови на запалени свеќи, детски играчки и фотографии од жртвите, додека низ градот владее тишина и чувство на заедништво.
Граѓаните повикуваат државата конечно да ја преземе одговорноста и да овозможи правда за жртвите и нивните семејства, потсетувајќи дека „сеќавањето е должност, а правдата – обврска.“
Трагедијата во голема мера се припишува на владина небрежност, ендемска корупција и сомнителни зделки склучени со кинески градежни компании кои учествуваа во неодамнешните реновирања на железничката станица. Првично, протестите започнаа како спорадични демонстрации на кои се бараше одговорност за трагедијата во Нови Сад. Сепак, тие брзо еволуираа во национално движење кое се занимаваше со пошироки прашања како што се барањата за предвремени избори и големи демократски реформи. Движењето доби широка поддршка од различни сегменти на српското општество.