Претседателот на СДСМ, Венко Филипче, најави создавање на многу поширок, посилен и поорганизиран опозициски фронт во наредните месеци, со вклучување не само на политички чинители, туку и на граѓански организации. Тој подвлече дека СДСМ е единствената политичка сила способна да ѝ парира и да се соочи со ВМРО-ДПМНЕ.
„Потребен ни е многу поширок, посилен и поорганизиран фронт – тоа е една од лекциите кои ги научивме за време на овие локални избори и сум сигурен дека тоа ќе го спроведеме во периодот што следи“, изјави Филипче на денешната прес-конференција.
Тој потврди дека следуваат промени во раководството и политиките на СДСМ, но нагласи дека идеолошката основа и вредносните политики на Социјалдемократскиот сојуз остануваат непроменети. Подолг период, додаде, се работи на нова програма што опфаќа различни сектори во согласност со социјалдемократските принципи.
Филипче ги следи реакциите и незадоволството во јавноста и во партиското членство по изборните резултати, кои ги поврза со неисполнети очекувања.
„Разговарам со многу луѓе, ги пратам и реакциите кои стигнуваат до мене преку социјалните мрежи. Ја разбирам негативната емоција, сметам дека се должи на неисполнети очекувања во очи изборите и ги разбирам граѓаните. Сметам дека кога емоциите ќе спласнат ќе може да се дебатира поразумно, пофер и поотворено. Од бројните разговори ќе ги водам ќе ги изберам најдобрите луѓе кои ќе бидат дел од тимот во следниот период. Најавив дека тоа ќе се случи оваа недела, но сепак ќе треба повеќе време, не сакам да се избрза со тој процес“, додаде лидерот на СДСМ и најави динамичен период во опозицискиот блок.
Филипче претходно изјави дека нема да поднесе оставка од функцијата претседател, но дека локалните избори се јасен патоказ за потребните политички и кадровски промени. По вториот круг на локалните избори, оставка поднесе една од потпретседателките на СДСМ, Ана Чупеска.