Рускиот министер за надворешни работи изјави дека е подготвен да се сретне со американскиот државен секретар Марко Рубио, но нагласи дека мирот во Украина е можен само ако се земат предвид интересите на Русија, објави државната новинска агенција РИА Новости.
„Американскиот државен секретар Марко Рубио и јас ја разбираме потребата од редовна комуникација. Ова е важно за дискусија за украинското прашање и промовирање на билатералната агенда. Затоа одржуваме телефонски разговори и сме подготвени да одржиме средба лице в лице кога е потребно“, рече Сергеј Лавров.
Според западните медиуми, вклучувајќи ги Ројтерс и Фајненшл тајмс, обидите за организирање нова средба меѓу Путин и американскиот претседател Доналд Трамп беа замрзнати минатиот месец откако руското Министерство за надворешни работи испрати порака дека Москва нема да отстапи од своите позиции за Украина.
Фајненшл тајмс цитираше извор кој рече дека разговорот меѓу Лавров и Рубио „го оладил ентузијазмот на Вашингтон“ за нов самит.