Главниот уредник на весникот „Коха“, Ведат Мемедалија, изрази сомнеж околу изборот на Ајхан Сулковски, советник од коалицијата Вреди, за претседавач на Советот на Општина Кичево. Според Мемедалија, спорно е што Сулковски се претставува како Македонец-муслиман, понекогаш како Албанец или Турчин, а најчесто како Торбеш.
„Теута Ахмеди-Пурелку, Фадил Емини и Ајхан Сулковски се тројцата советници на Вреди во Општина Кичево од вкупно 19. Првите двајца се декларирани како Албанци, додека третиот – понекогаш како Турчин, понекогаш како муслимански Македонец и почесто како Торбеш. И, коалицијата ВМРО-Вреди го предлага третиот, Сулковски за претседател на Советот. Осум советници на ВМРО, три на Вреди и еден од СДСМ гласаат за Сулковски. Нека верата оди докрај!“, напиша Мемедалија на својот фејсбук-профил.
Притоа, уредникот не појаснува зошто изборот на Сулковски е проблематичен ниту што точно подразбира под изразот „нека верата оди докрај“. Тој, исто така, не наведува конкретни примери или контексти кога Сулковски се изјаснувал како Турчин, македонски муслиман или Торбеш.
Ведат Мемедалија е главен уредник на „Коха“, весник што се смета за близок до ДУИ.
На локалните избори од 19 октомври, ВМРО-ДПМНЕ освои осум советнички места во Кичево, ДУИ пет, коалицијата Вреди три, СДСМ еден, додека советничката листа е комплетирана со двајца независни советници.