„Вистинското прашање е: Врз основа на што Данска тврди дека има контрола врз Гренланд? Која е основата за нивното територијално барање? Која е нивната основа за држење на Гренланд како колонија?“, праша Милер во интервју за CNN.
Еден ден претходно, сопругата на Милер, Кети, објави мапа на Гренланд обоена со американското знаме и натпис: „Наскоро“.
Ова предизвика реакција и од властите во Данска и од Гренланд, како и од европските политичари како што е францускиот претседател Макрон.
Нападот на САД врз сојузник на НАТО би значел крај и на воениот сојуз и на безбедноста по Втората светска војна, предупреди данската премиерка Мете Фредериксен. „Ако САД одлучат воено да нападнат друга земја од НАТО, тогаш сè ќе престане – тоа го вклучува и НАТО, а со тоа и безбедноста по Втората светска војна“, изјави таа за данската телевизија TV2.
„Никој нема воено да се бори против САД за иднината на Гренланд“, рече Милер денес. „Ние сме суперсила и под претседателот Трамп ќе се однесуваме како суперсила. Смешно е што дозволуваме земја во нашиот двор да стане снабдувач на ресурси за нашите противници, но не и за нас“, изјави Милер за CNN.
Гренланд е дански со векови. Данците го основале главниот град Нук на почетокот на 18 век, а по Наполеоновите војни, колонијалниот статус на островот бил потврден со Килскиот договор.
Со промена на данскиот устав во 1953 година, Гренланд престанал да биде колонија и станал рамноправен округ во рамките на Кралството Данск, а Гренландците добиле данско државјанство.
Во 1979 година, Гренланд добил внатрешна самоуправа и свој парламент, потоа ја напуштил ЕЕЗ, а во 2009 година, по референдум, добил уште поголема автономија, вклучувајќи го и правото на своите природни ресурси и признавање на гренландскиот јазик како службен јазик.