Дефинитивно нема да има пролонгирање на учебната година поради вирусите и грипот. Нема пречки за почеток на второто полугодие од учебната година во сите основни и средни училишта низ земјава, соопшти министерката за образование и наука Весна Јаневска при посетата на Универзитетот „Гоце Делчев“ во Штип, одговарајќи на новинарско прашање дали со оглед на состојбата со грипот може да има одлагање на почетокот на наставниот процес.
- „Учебната година во сите училишта на територијата на државата почнува на 20 јануари. Вчера имавме изјава од Министерството за здравство и од Институтот за јавно здравје дека нема пречки да стартува второто полугодие од оваа учебна година“, рече министерката.
Министерката апелира до родителите и до учениците да бидат редовни во училиштата и што е можно поретко да отсуствуваат, зашто, како што додаде, сите испитувања и во земјава и во светот покажуваат дека оние што редовно ја посетуваат наставата постигнуваат подобри резултати.
- „Апелирам до родителите да престанат со праксата да им ги оправдуваат часовите на децата и да користат одмори по прифатливи за време на учебната година. Децата треба да се од првиот до последниот ден на училиште, освен кога државата, поради некаква поголема сила, ќе одлучи дека тоа не треба да биде така“, вели таа.
Од Институтот за јавно здравје соопштија дека иако во земјава расте бројот на заболени од грип, сепак на национално ниво вирусот има средна активност, што засега не дава можност да се даваат или да се воведуваат дополнителни мерки како, на пример, продолжување на зимскиот распуст.
Од почетокот на октомври до 11 јануари има 6 147 заболени од грип. Во земјава доминира грип од типот АХ3. Најголем број на заболени од грип има во Скопје, а потоа следуваат Тетово, Куманово и Охрид. Само во Берово, Делчево и Пехчево нема регистрирани случаи на грип.