Логистичкиот конзорциум на Босна и Херцеговина, кој ги претставува професионалните превозници, објави дека се евидентирани 100 случаи на присилно или насилно враќање на професионални возачи од земјите на Европската Унија, како и повеќе од 100 дена поминати во притвор и затвори на земјите-членки на ЕУ. Истовремено надлежните институции на Германија, Австрија, Полска и други земји потврдија дека само вчера се обработени дополнителни 100 нови случаи на присилно враќање. Според Конзорциумот, станува збор за професионални возачи кои се редовно вработени, имаат важечки договори за работа и комплетна документација, но и покрај ова, тие се прогласени за лица кои се „нелегално“ на територијата на одредени земји од ЕУ и се присилно отстранети.
Паралено, превозници од Македонија в понеделник ќе ги блокираат 9-те гранични премини кон Бугарија, Грција, Албанија и Косово. Точно на пладне, заедно со колегите од Србија, Црна Гора и Босна и Херцеговина ќе ги паркираат камионите на транспортните терминали на границите, најавувајќи целосна блокада на товарниот сообраќај кон Европската Унија.
Превозниците се незадоволни од новиот систем за влез и излез во земјите од Шенген зоната, со кој им се ограничува времето за престој на само 90, односно 180 дена годишно. Транспортерите некогаш транзитираат низ 5,6 држави за да ја испорачаат пратката. Не можат да бројат денови, кога не зависи се од нив, велат од Асоцијацијата на превозници.
- Не станува збор само за превозниците, за извозните компании, туку штета ќе имаат и странските фирми кои работат во земјата, па и цела економија. Ќе има нарушување на синџирот на испорака на репроматеријали. Голем дел од транспортот чини од 1,500 до 2,000 евра, ќе нема кој да вози и цената ќе порасне најмалку 3,4 пати, изјави Билјана Муратовска, претседателката на „Макам-транс“.
Конзорциумот објаснува дека терминот присилно враќање (депортација) подразбира ситуација во која поединецот, врз основа на формално толкување на престојот или проценка на ризикот, е прогласен за лице со нелегален престој, без оглед на статусот на вработување, договорот за работа и документацијата, и е присилно вратен во матичната земја.
Во последните 365 дена, само во Германија, тврдат тие, 100 професионални возачи се насилно отстранети само затоа што ја извршуваат својата работа во меѓународниот патен транспорт. Конзорциумот истакнува дека станува збор за лица кои не го кршат законот, не бараат азил, не претставуваат безбедносен, миграциски или социјален ризик, туку само извршуваат професионална работа.
Според Конзорциумот, оваа практика претставува директно кршење на основното право на работа и е спротивна на Спогодбата за стабилизација и асоцијација, меѓународните договори за труд и вработување, принципите на слободно движење на стоки и функционирањето на синџирите на снабдување, како и на разликата помеѓу професионални возачи и туристи или нерегуларни мигранти.
Тие предупредуваат дека продолжувањето на оваа практика ќе има не само секторски, туку и сериозни економски, социјални и стратешки последици за Босна и Херцеговина и ги повикуваат институциите во БиХ да преземат активности за надминување на состојбата.
Превозниците од Западен Балкан најавија дека на 26 јануари ќе ги блокираат границите кон Европската Унија со цел да укажат дека системот за влез и излез од Шенген зоната не треба да важи за професионалните транспортни возачи.