Вчерашното изненадувачко затворање на воздушниот простор над Ел Пасо, Тексас, предизвика вистинска бура од шпекулации на социјалните мрежи – од теории за терористи со противвоздушни ракети скриени во пустината, преку „скриена зомби апокалипса“ со Ел Пасо како епицентар, па дури и дека администрацијата на Трамп почнала да пука со високо-енергетски ласери во небото без да праша никого.
Колку и да звучи научнофантастично, третата опција се покажа најблиску до вистината.
Според извештаите од CBS News, CNN, AP News, The New York Times, NPR и други медиуми објавени на 11 и 12 февруари 2026 година, затворањето на воздушниот простор беше предизвикано од несогласување и лоша координација меѓу Федералната авијациска администрација (FAA) и Пентагон околу тестирање на високо-енергетско ласерско оружје за борба против дронови.
Пентагон, преку Министерството за одбрана, планирал да го тестира ласерот за неутрализација на дронови – вклучително и оние што ги користат мексиканските картелите за шверц и набљудување – во близина на воената база Fort Bliss, која се наоѓа непосредно до меѓународниот аеродром на Ел Пасо.
Тестот бил закажан пред официјалната средба на 20 февруари, на која FAA и Пентагон требало да разговараат за потенцијалните ризици за цивилниот воздушниот сообраќај.
Претходно, Customs and Border Protection (CBP), со дозвола од Пентагон, го користел ласерот за да собори објект што бил сметан за „картел дрон“. Подоцна се испостави дека станува збор за обичен парти балон, веројатно од некоја прослава.
Ова предизвикало загриженост кај FAA дека ласерот може да претставува ризик за комерцијални летови. Администраторот на FAA, Брајан Бедфорд, наредил итно затворање на воздушниот простор до 18.000 стапки, вклучително и аеродромот, за 10 дена, со предупредување дека може да се употреби „смртоносна сила“ против авиони што ќе ја прекршат забраната.
Ова било сторено без претходно известување на Белата куќа, Пентагон или други агенции.
Затворањето траело само неколку часа – од доцна во вторникот до раните утрински часови во средата. FAA го укинала откако било утврдено дека нема повеќе ризик, а летовите се нормализирале. Откажани биле околу 14 летови, а патниците биле заглавени на аеродромот.
Трамп администрацијата, вклучително секретарот за транспорт Шон Дафи, првично тврдела дека затворањето било поради „инцидент со дрон од картел“ што бил неутрализиран. Подоцна извори од Пентагон и FAA потврдија дека проблемот бил во ласерската технологија и лошата координација.
Овој инцидент ја истакнува растечката тензија меѓу цивилната авијација и воените тестови во граничниот регион, каде што дроновите од картелите се сериозен предизвик.
Ласерската технологија за контра-дронови е дел од програмите на Пентагон, но тестови во близина на аеродроми предизвикуваат сериозни безбедносни грижи.
Социјалните мрежи го искористија хаосот за мемови и теории на заговор – од „Трамп пука со ласери“ до „зомби апокалипса“ – но реалноста е класична бирократска грешка: лоша комуникација меѓу агенциите, парти балон како колатерална жртва и привремен хаос на аеродромот. Добредојдовме во 2026 година.