Во Основниот кривичен суд во Скопје денеска продолжи судењето против Стојанче Јовановски за смртта на неговата сопруга Ивана и ќерката Катја, при што сведочеше Мартин Саздов. Тој одговараше на прашања од одбраната, а во својот исказ изнесе нови детали за односот меѓу обвинетиот и Ивана, како и за наводното семејно насилство, пренесе МИА. Саздов сведочеше дека Ивана не сакала случајот да се пријавува во полиција, туку се надевала дека проблемите ќе се решат без институционална постапка.
Ивана сакаше да се реши убаво работата, да нема пријавувања, додаде меѓу другото сведокот – одговарајќи на прашања на одбраната.
Во текот на рочиштето, обвинетиот директно му поставуваше прашања на сведокот. -Дали со Ивана правевте планови како да се ослободите од мене? – го праша Стојанче Мартин, на што тој одговори – да.
Стојанче го праша зошто не го пријавил инцидентот кога бил удрен со возило, како и наводниот напад со калашников, што Саздов го негираше. Тој објасни дека не пријавил затоа што му било жал и сакал случајот да се заборави.
Во судницата беа изнесени и обвинувања дека Саздов наводно испратил лице да го тепа Стојанче во затворот Шутка, што сведокот категорично го отфрли. -Јас не познавам таков човек и никогаш не сум бил во контакт со некој од затворот – одговори Мартин.
Во однос на експлицитните видеа, Саздов објасни дека Ивана му побарала да ѝ ги испрати, но подоцна дознал дека тоа било по притисок од Стојанче. -Ивана ми пиша порака те молам прати ми ги видеата, многу ми е битно, потоа дознав Стојанче ја терал тоа да го напише – одговори Саздов.
Тој негираше и дека ѝ се заканувал на Ивана во врска со нејзиното дете. -Не можам да се заканувам со тоа дека можам да одземам нечие дете – одговори Мартин.
Саздов сведочеше дека не видел директно физичко насилство врз Катја, но потврди дека Стојанче ја навредувал. Ивана му раскажувала и за ситуации во домот, како на пример кога Катја земала нешто од него, по што тој реагирал агресивно. На прашање од судијата, сведокот изјави дека Ивана била многу загрижена за иднината на детето и условите за живот. -Да, беше загрижена, ми викаше цело време – Катја си ја сака собата. „Ако не сме тука во станот, каде ќе одиме?“ – тврди Мартин.
Тој додаде дека Ивана имала добри односи со своето семејство, но дека тие се нарушиле откако се откажала од наследството од татко ѝ поради ситуацијата со Стојанче. Според сведочењето, мајките на Ивана и Стојанче тајно им носеле храна, бидејќи обвинетиот еднаш ја фрлил храната што ја донела мајката на Ивана. Во делот за насилството, Саздов изнесе тешки обвинувања за физичко малтретирање.
-Стојанче ја газел со нозете по стомакот – сведочеше Мартин, зборувајќи околу повредите на Ивана, модринките и слично. Дополнително, сведокот посочи дека бил оттурнат кога сакал да пријави насилство во полициска станица.
-Кој си ти да пријавуваш, го избркале од полициска станица кога сакал да пријави насилство врз Ивана, сведочи Мартин. На рочиштето сведочеше и Ивана Белчева, која изјави дека не го познавала обвинетиот и дека првпат го видела на 19 декември 2025 година, пред маркет во Ѓорче Петров, каде што забележала расправија и вознемирено дете.
-Забележавме луѓе кои се расправаат – рече таа, а девојче плачело. Таа заедно со друга жена се обидела да ја смири ситуацијата и да го утеши детето. -Јас и жената застанавме помеѓу Стојанче и Ивана да ги разделиме – сведочеше таа.
Белчева ја земала Катја во прегратки за да ја смири, додека, според нејзиниот исказ, Стојанче повторно ја удрил Ивана по главата и телото. Потоа била повикана полиција, а таа дала изјава и потпишала записник. На прашање од одбраната, таа додаде дека во еден момент видела расправија меѓу Ивана и трета жена, но не забележала физички контакт, иако слушнала дека имало.
Судењето продолжува утре со сослушување на братот на Ивана, наставничката на Катја и сосетка.