Околу 20.000 поморци се заглавени на приближно 2.000 пловила во Ормутскиот теснец од почетокот на американско-израелскиот конфликт со Иран, информира Меѓународната поморска организација. Меѓу блокираните пловила има танкери за нафта и гас, бродови за расут товар, контејнерски бродови и туристички крузери, што дополнително го нагласува глобалното значење на кризата.
Според податоците, од почетокот на војната се регистрирани најмалку 19 напади врз бродови во теснецот, при што загинале најмалку 10 поморци, а осум се повредени.
- „Движењето на бродовите има за цел само да ослободи луѓе, компании и земји кои не направиле апсолутно ништо лошо – тие се жртви на околностите. Доколку, на кој било начин, се попречи овој хуманитарен процес, за жал, ќе мора интервенираме енергично“ – објава на претседателот на САД – Доналд Трамп.
- „Поддржувачите на злонамерните Соединети Држави треба да бидат претпазливи и да избегнуваат дејствија што би довеле до неповратно жалење. Секој агресивен потег на САД за нарушување на моменталната ситуација само дополнително ќе ги комплицира работите и ќе ја загрози безбедноста на бродовите во оваа област“, изјави Ген. Али Абдолахи – командант на Централниот штаб на Хатам ал-Анбија.
Организацијата предупредува дека условите на бродовите се влошуваат, со сериозен недостиг од храна, гориво и вода за екипажите што остануваат заробени во Персискиот Залив.
- „Оваа ситуација, во која толкав број поморци останаа блокирани, е без преседан во современото време“, изјави во март директорот за поморска безбедност во организацијата, Дамиен Шевалие.
Ормутскиот теснец, како една од најважните светски трговски и енергетски рути, останува клучна точка на ризик, додека обидите за деблокада сè уште не даваат конкретни резултати.
Во исто време, Техеран го разгледува одговорот на САД на својот последен предлог за прекин на војната кој содржи 14 точки. Иран бара од САД да ги укинат санкциите, да ја прекинат поморската блокада, да ги повлечат силите од регионот и да ги прекинат сите непријателства, вклучително и израелските операции во Либан. Во предложеното не се споменуваат нуклеарните амбиции на Исламската Република.
- „Можете да претпоставите дека САД не се навикнати да ги напуштат своите прекумерни барања и неразумни очекувања. Затоа, сè уште се справуваме со страна која постојано ги менува своите ставови и покренува прашања што, во пракса, можат да го нарушат секој дипломатски процес“, изјави Есмаил Багаеи – портпарол на МНР на Иран.
Иран негира дека се стреми кон нуклеарна бомба и вели дека програмата е само за мирни цели, иако земјата е единствената држава без нуклеарно оружје што има збогатен ураниум на ниво на оружје.