Директорот на Бирото за јавна безбедност при Министерството за внатрешни работи, Александар Јанев, на централната манифестација по повод 7 Мај – Денот на македонската полиција, истакна дека денеска не се одбележува само професија, туку се потврдува должноста да се служи на граѓаните, државата и довербата која им се дава.
„Ова е професија што бара одлуки тогаш кога е најтешко, професија што значи служба секој ден со чест, одговорност и без компромис“, рече Јанев.
Тој посочи дека живееме во време на сложени безбедносни предизвици, при што криминалот е технолошки напреден, адаптивен и агресивен.
„Се обидува да навлезе во сите сегменти на системот, да ја поткопа довербата и да ја ослаби силата на институциите. Нашата порака е јасна: државата е посилна. Водиме одлучна, системска и безкомпромисна борба против криминалните групи во сите области. Системски дејствуваме врз нивните структури, врски, нивната логистика и нивниот капитал. Никој не е над законот“, потенцираше директорот на БЈБ.
Јанев нагласи дека силна полиција се гради со визија, инвестирајќи во модернизација, воведување нови алатки, современи системи и технологии. Сепак, според него, најсилното оружје на полицијата е обучениот, стабилен, чесен и професионален полициски службеник.
„Технологијата помага, опремата поддржува, но човекот е тој што ја носи одлуката, ја превзема одговорноста и ја брани довербата“, рече Јанев.
Тој додаде дека македонската полиција е позиционирана рамо до рамо со светските полиции и придонесува за стабилност не само на регионот, туку и пошироко.
„Нашата служба е силна мисија – мисија да служиме, обезбедиме, заштитиме. Да има ред, правда и одговорност. Кога полицијата стои цврсто, државата стои исправено“, заклучи Александар Јанев.