Министерката за финансии, Гордана Димитриеска-Кочоска, го повика економскиот тим на СДСМ на отворена средба во Министерството за финансии, при што остро ја обвини опозицијата дека шири „паника, невистини и политички конструкции“ за економската состојба во земјата.
Според неа, економските показатели јасно сведочат за стабилизација и раст, а критиките од страна на Венко Филипче и СДСМ ги оцени како „хистерични прес-конференции“ без реална основа.
„За економијата не се зборува со паника. За економијата зборуваат бројките. А токму со бројките опозицијата не стои баш добро“, порача министерката.
Таа истакна дека Владата наследила „празна каса, натрупани долгови и нарушена доверба“, нагласувајќи дека јавниот долг од 4,78 милијарди евра во 2017 година пораснал на речиси 9 милијарди евра до вториот квартал од 2024 година.
„Тоа е практично двојно зголемување на јавниот долг за време на владеењето на СДСМ“, рече Димитриеска-Кочоска.
Министерката посочи дека во изминатите шест квартали економијата бележи раст од околу 3 проценти, а во 2025 година растот достигнува околу 3,5 проценти. Платите растат со динамика близу 10 проценти, бројот на нововработени лица се зголемува, а капиталните инвестиции се реализираат на историски високо ниво.
Таа додаде дека Владата истовремено сервисира стари долгови и финансира нови капитални проекти, при што минатата година била отплатена еврообврзница од 500 милиони евра, а оваа година достасува обврзница од 700 милиони евра. Од 2026 до 2031 година, државата има обврска да сервисира околу 9 милијарди евра по основ на главнина и камати.
Димитриеска-Кочоска ја обвини претходната власт дека оставила „хаос во јавните финансии“, додека актуелната влада води „домаќинска, внимателна и одговорна политика“.
„Фактите, бројките и резултатите се на страната на Владата. А кога е така, политичките конструкции многу брзо паѓаат во вода“, заклучи министерката за финансии.