Основниот кривичен суд Скопје го ослободи од вина Зоран Јованов, татко на Васил Јованов кој ја предизвика сообраќајната несреќа на булеварот партизански одреди во Скопје во која смртно страдаше Фросина Кулакова. На Зоран Јованов му се судеше за загрозување на безбедноста на сообраќајот, зато што, според Обвинителството, тој во период од ноември 2022 до јануари 2025 година свесно му дозволувал на својот син (Васил Јованов) да управува автомобил иако знаел дека нема возачка дозвола, претходно имал повеќе сообраќајни прекршоци и постоел ризик за загрозување на други учесници во сообраќајот. Сообраќајната несреќа која ја предизвика Васил Јованов, а во која загина Фросина Кулакова, се случи на 29 јануари 2025 година на булеварот „Партизански одреди“ во центарот на Скопје.
Согласно образложението на пресудата, судот оцени дека кривична одговорност на Зоран Јованов не може да се заснова само врз фактот што тој е сопственик на возилото и што неговиот полнолетен син управувал со тоа возило без возачка дозвола, по што предизвика тешка сообраќајна несреќа во која загина Фросина Кулакова.
„Законодавецот ваквото однесување изречно го регулирал и санкционирал како прекршок во Законот за безбедност на сообраќајот на патиштата, а судот не може преку проширено толкување на кривичниот закон да создава нови облици на кривична одговорност кои законодавецот не ги предвидел. Повторувањето на едно прекршочно однесување, само по себе, не го претвора во кривично дело. Бројот на прекршоците не може да создаде нов правен квалитет на дејствие доколку не се исполнети законските обележја на конкретното кривично дело“, се наведува во соопштението на Основниот кривичен суд Скопје.
Оттаму додаваат дека во конкретниот случај, непосреден извор на опасност и непосреден причинител на настанатата последица )сообраќајната несреќа и смртта на Кулакова) е полнолетниот возач како самостоен учесник во сообраќајот.
„Кривичното право почива врз начелото на лична и индивидуална одговорност, поради што последиците од самостојното постапување на едно полнолетно лице не можат автоматски да му се припишат на друго лице само поради роднинска врска или поради сопственост на возилото“, велат од Кривичниот суд.
Сообраќајната несреќа која ја предизвика Васил Јованов, а во која загина Фросина Кулакова, се случи на 29 јануари 2025 година на булеварот „Партизански одреди“ во центарот на Скопје. Поради тоа, Васил Јованов е правосилно осуден на 13 години затвор, казна која ја издржува во затворот во Идризово, скопско.
Одлуката ја донесе истата судијка Снежана Марковска која го осуди Васил Јованов на 12 години затвор. Против оваа одлука може да се жалат пред Апелација.