Младите остануваат во фокусот на политиките на Владата, а за мерките за вработување во 2026 година се обезбедени речиси 40 милиони евра, со кои треба да бидат опфатени повеќе од 10.000 граѓани, соопштија од ВМРО-ДПМНЕ. Од партијата наведуваат дека намалувањето на невработеноста и отворањето нови работни места остануваат меѓу главните приоритети на Владата, посочувајќи дека резултатите од досегашните мерки веќе се видливи.
- „Младите остануваат во центарот на политиките на Владата предводена од ВМРО-ДПМНЕ. ВМРО-ДПМНЕ покажува со дела, а не со зборови. Намалувањето на невработеноста и отворањето нови работни места остануваат врвен приоритет на Владата“, велат од партијата.
Според соопштението, преку Оперативниот план за вработување во 2025 година биле опфатени над 2.600 лица, од кои речиси 1.500 млади до 29 години, додека биле отворени и близу 2.200 нови бизниси. Од ВМРО-ДПМНЕ истакнуваат дека средствата за Оперативниот план за вработување во 2025 година биле зголемени за 7,5 милиони евра во споредба со претходната година.
- „Во 2026 година Владата оди чекор понатаму. Обезбедени се речиси 40 милиони евра за поддршка на вработувањето, со опфат на повеќе од 10.000 граѓани. Над 32 милиони евра директно се насочени кон мерки што ќе создадат нови можности за работа и економски развој“, се наведува во соопштението.
Од партијата додаваат дека со Оперативниот план за 2026 година речиси 6.000 млади лица ќе бидат вклучени во активните мерки за вработување.
- „Дополнително, илјадници млади ќе добијат поддршка преку младински додаток, практикантства и обуки за стекнување нови вештини“, наведуваат од ВМРО-ДПМНЕ.
Во соопштението се посочува и дека преку мерките за самовработување и поддршка за отворање нови работни места е предвидена стимулација за вработување на младите во производните капацитети.
- „За околу 3.500 млади лица до 23 години е обезбеден младински додаток од 3.000 денари“, истакнуваат од партијата.
Од ВМРО-ДПМНЕ оценуваат дека овие политики придонесуваат за создавање нови можности за младите и нивно задржување во земјава.
- „ВМРО-ДПМНЕ гради економија што создава шанси, ги задржува младите дома и обезбедува сигурна иднина за секој граѓанин. Работиме посветено, инвестираме во луѓето и испорачуваме конкретни резултати“, се наведува во партиското соопштение.