Пратеникот на ВМРО-ДПМНЕ Бојан Стојаноски денеска ја повика опозицијата да постигне договор за измените на Изборниот законик, нагласувајќи дека владејачкото мнозинство ќе ја поддржи секоја варијанта што ќе ја усогласат опозициските партии, сè додека во законското решение е задржано гласањето на дијаспората.
-Сакам да ја потсетам јавноста дека изминатата недела, поточно во саботата, како и оваа недела во вторникот, се одржаа средби на работната група составена од координаторите во Собранието. На состанокот во вторникот излеговме со конкретна понуда за надминување на разликите околу Изборниот законик. Денес е петок, а сè уште немаме никаков одговор на нашата понуда, ниту, пак, е најавена нова средба од страна на опозициските партии, изјави Стојаноски.
Тој потсети дека 15 јули е крајниот рок за исполнување на обврските поврзани со изборните реформи и оцени дека темата е премногу важна за да биде предмет на политички пресметки.
-Понеделник е веќе 13 јули, а крајниот рок е 15 јули. Сметаме дека ова прашање е пресериозно за да се политизира. Во изминатите денови слушнавме различни ставови и предлози од опозициските партии за една изборна единица, финансирањето на политичките партии и други прашања, но наместо јавни препукувања, време е да седнат и да се договорат, рече Стојаноски.
Тој порача дека ВМРО-ДПМНЕ ќе даде безусловна поддршка за секое решение што ќе биде резултат на договор меѓу опозициските партии.
-Сè што ќе договорат ДУИ, СДСМ, Левица, како и блоковите на Зијадин Села и Арбен Таравари и ќе го преточат во законски текст, ние ќе го прифатиме. Доколку се договорат за една изборна единица – ќе прифатиме. Ако се договорат за моделот на финансирање на политичките партии – ќе прифатиме. Ако имаат договор за моделот на поплаки – ќе го прифатиме. Даваме бланко поддршка за сè што ќе предложат, со единствен услов во законското решение да биде вклучено гласањето на дијаспората, истакна Стојаноски.
Според него, има доволно време до 15 јули за да се постигне договор и да се исполнат сите предвидени обврски.
-Повторно апелирам до опозициските партии да седнат и да се договорат. Ние сме подготвени веднаш да го поддржиме нивниот договор, доколку е предвидено гласањето на дијаспората. На тој начин ќе ја исполниме оваа цел и ќе овозможиме нашите иселеници да го остварат своето право на глас, порача Стојаноски.