Американскиот претседател Доналд Трамп изјави дека САД треба да ја преземат контролата врз Ормускиот Теснец, да ја осигураат безбедноста на пловидбата и да им наплаќаат на другите земји за тоа, што е спротивно на она што го кажа пред само еден месец.
„Ќе го задржиме теснецот и веројатно ќе управуваме со него. Ќе станеме чувари на теснецот. Можеби ќе се наречеме ангел чувар на теснецот и треба да бидеме платени за тоа“, рече Трамп во интервју за Фокс њуз.
Тој додаде дека САД не можат да ја работат оваа работа бесплатно и дека земјите што имаат корист од безбедното минување треба да му ги надоместат трошоците на Вашингтон.
„Ќе го заштитиме и ќе бидеме добро платени за тоа“, рече Трамп.
Подоцна тој се огласи на социјалната мрежа „Truth Social“ за да објави дека САД ќе наплаќаат за користење на теснецот „по стапка од 20 отсто на целиот товар што се испраќа“.
„Ормускиот Теснец е отворен и ќе остане отворен, со или без Иран. Повторно ја воспоставуваме иранската блокада, така наречена затоа што им оневозможува на иранските бродови или клиенти да влегуваат или излегуваат. Сите други земји ќе имаат фер и отворена употреба на теснецот. САД, отсега, ќе бидат познати како ‘чувари на Ормускиот Теснец’, но како такви и од причини на праведност, ќе им биде надоместено по стапка од 20 отсто од целиот товар што се испраќа, за сите трошоци потребни за да се овозможи безбедност и сигурност во овој многу нестабилен дел од светот. Процесот и формирањето ќе започнат веднаш“, рече Трамп.
Оваа изјава е во спротивност со она што тој го кажа пред само еден месец, кога инсистираше дека САД, во согласност со мировниот договор потпишан со Иран, ќе го отворат повторно Ормускиот Теснец „бесплатно“.
„Тоа е меѓународен воден пат. Ниту една земја не смее да наплаќа патарини или такси на меѓународен воден пат. Тоа е важечко меѓународно право“, рече тогаш американскиот државен секретар Марко Рубио.