Македонската вечер во рамки на „Тетово прославува – Тетовско културно лето 2025“ уште еднаш покажа дека културата зборува на јазикот на соживотот, порача претседателката Гордана Сиљановска Давкова по вчерашната посета на Тетово.
,,Идејата да се одржуваат македонска, албанска, турска и ромска културна вечер е за поздравување, како неспорен израз на меѓусебно почитување и разбирање.
Преку играта на КУД „Кирил Пејчиновиќ“ од Теарце, енергијата на The Nameless Trio, гласот на Лозано, како и тетовскиот рапер Никола Трпески S.A.M. Тетово раскажа приказна за традицијата, младоста и современиот дух”, објави претседателката Гордана Сиљановска Давкова која упати благодарност до градоначалникот Билал Касами за поканата и до сите уметници коишто придонесоа за ова уникатно доживување.