Повеќе од 250 доброволни пожарникари од сите активни доброволни противпожарни друштва во државата се ставени на располагање на националниот систем за справување со летните пожари.
Директорот на Дирекцијата за заштита и спасување, Стојанче Ангелов, изјави дека годинава државата е најподготвена досега и дека доброволните сили за првпат ќе бидат обединети под единствена команда.
Тој истакна дека тимовите за брз одговор ќе ги сочинуваат исклучиво членови на доброволните противпожарни друштва.
На пистата во касарната „Гоце Делчев“ во Општина Аеродром денеска беше извршено постројување на повеќе од 250 доброволни пожарникари од сите активни доброволни противпожарни друштва во Македонија, кои ќе бидат дел од Тимовите за брз одговор на Дирекцијата за заштита и спасување во борбата против летните пожари на отворен простор.
Според ДЗС, со постројувањето за првпат е утврдена реалната бројка на доброволци кои организирано ќе можат да бидат ангажирани при интервенции низ целата држава.
„ Да покажеме дека ве има! Да покажеме колку ве има! За првпат сите доброволни противпожарни друштва имаат можност да бидат обединети под една заедничка команда и организирано да се вклучат во националниот систем за гаснење на летните пожари“, порача Ангелов.
„Пред мене стојат повеќе од 250 доброволни пожарникари. Од денес јавноста ќе знае дека сте сериозна и респектабилна сила – рече директорот на ДЗС.
Ангелов најави развој и јакнење на доброволното пожарникарство.
ДЗС веќе иницирала законски измени за подобрување на статусот на доброволните противпожарни друштва, како и измени во Законот за пожарникарство, рече тој
Воедно најави дека доброволните пожарникари ќе добиваат дневен надоместок за секој ден кога ќе бидат ангажирани од Дирекцијата.