Во местото Станиќи во близината на Омиш, кадешто синоќа изби голем пожар, денеска околу 13:30 часот е пронајдено тело, кое медиумите во Хрватска го поврзуваат со 34-годишната државјанка на Босна и Херцеговина, Драгана Антешевиќ, објавена за исчезната токму кога пламените јазици создаваа апокалиптична сцена околу градот на јадранскиот брег.
Според медиумските извештаи, таа бегала од огнената стихија во Станиќи со автомобил во кој имало уште две жени, кои се спасиле, но со тешки изгореници по телото.
Вкупно 43 лица побарале помош во здравствените институции, од кои 14 потешко повредени, од нив осуммина се борат за живот.
Речиси 2.400 лица, меѓу нив најголем број странски туристи, се привремено згрижени во прифатни центри во Омиш, Сплит и Макарска.