Центарот за управување со кризи (ЦУК) информира дека во изминатото деноноќие, од 19 до 20 август до 07:30 часот, на територијата на Македонија биле регистрирани вкупно 37 пожари на отворен простор. Пет се сè уште активни, еден е ставен под контрола, а 31 пожар е изгаснат.
Најкритична и натаму е состојбата во Мариово, каде што активен е пожарот кај селото Чаниште, на повеќе краци.
Огнот зафаќа простор од село Чаниште кон Крушевица и Лопатица, како и крак кон Црна Река и крак кон селото Орле, на територијата на Општина Новаци. Гори ниска вегетација.
На барање од директорот на Дирекцијата за заштита и спасување Стојанче Ангелов, вчера конвој на Противпожарната бригада на Град Скопје се упати кон Мариово, а против огнената стихија се ангажирани и триесетина војници
Првпат летово превентивно во гаснењето на пожарите, во случајов во Мариовско, се ангажирани и триесетина војници.
Активен пожар има и во Општина Студеничани, каде што огнот се движи на потегот Моране – Вртекица – Рамни Габер. Таму е зафатена мешана шума.
Во Општина Македонски Брод активен е пожарот во месноста Видуш, кај селата Драгов Дол и Локвица. Гори ниска вегетација, нискостеблеста шума и грмушки.
Нова активна точка е регистрирана и во Општина Кичево, кај селото Тајмиште, во месноста Дарда, каде што гори високостеблеста букова шума.
Петтиот активен пожар е во Општина Могила, кај селото Мојно, каде што гори ниска вегетација.
Бројот на пожари што избувнале во текот на изминатото деноноќие покажува дека опасноста од нови жаришта останува висока.
Во текот на изминатите 24 часа пожарникарите и надлежните служби интервенирале на голем број локации низ земјава.
И покрај тоа што 31 пожар е изгаснат, пет активни пожари остануваат на терен, меѓу кои и оние што зафаќаат шумски површини, поради што состојбата продолжува да се следи.