Јаневска ги повика првачињата, покрај знаењето, да „побараат“ и братче или сестриче, со цел во иднина да има доволно ученици за повторно да се отворат училиштата што сега се привремено затворени.
„Ако продолжиме вака, постојано ќе затвораме училишта. Затоа пораката до првачињата е: освен што ќе побараат да стекнат знаење, можеби треба да побараат да стекнат и братче и сестриче, за да можеме повторно овие привремено затворени училишта, во иднина да ги отвораме“, рече Јаневска при посетата на ООУ „Ацо Шопов“ во Бутел.
Оваа учебна година има 433 паралелки помалку во споредба со минатата година – 222 во основното и 211 во средното образование. Намалувањето е резултат и на одлуката на Министерството за образование да се спојуваат малите паралелки во поголеми.
Според податоците што ги презентираше министерката, во земјава има вкупно 148 празни училишни објекти, од кои најголем дел се наоѓаат во руралните средини.
Од вкупно 1.023 централни и подрачни училишта, во 620 објекти оваа учебна година ќе се реализира настава во една смена.
Јаневска информираше и дека се обезбедени учебници за сите ученици, додека за децата со посебни образовни потреби се ангажирани вкупно 1.524 образовни асистенти – 1.358 во основното и 166 во средното образование.