ВМРО-ДПМНЕ ја обвини СДСМ за ширење лаги и дезинформации во врска со случајот „Алта банка“, оценувајќи дека опозицијата се обидува да создаде паника и да ја поткопа довербата во банкарскиот систем.
Реагирајќи на прес-конференцијата на Богданка Кузеска, од владејачката партија нагласуваат дека одлуките за банкарскиот сектор ги донесуваат Народната банка и гувернерот, а не премиерот и Владата.
Оттаму тврдат дека гувернерот Трајко Славески никогаш не изјавил оти одлуката за „Алта банка“ ја донел премиерот Христијан Мицкоски.
Од ВМРО-ДПМНЕ ја споредуваат ситуацијата со „Алта банка“ со пропаста на „Еуростандард банка“, обвинувајќи ги Зоран Заев и неговите деловни партнери дека ја уништиле банката преку кредити без покритие.
Според нив, разликата е јасна: проблемот со „Алта банка“ е увезен и произлегува од престанокот на работата на нејзината матична банка во странство.
„Разликата меѓу Алта банка и Еуростандард е тоа што Заевци ја украдоа банката, а во случајот со Алта, проблемот е увезен“, наведуваат од ВМРО-ДПМНЕ.
Партијата додава дека се очекува решение за случајот и уверува дека граѓаните нема да бидат оштетени.