Државниот архив на Македонија, во соработка со Државното средно училиште со ресурсен центар „Димитар Влахов“ – Скопје, денеска ќе го промовира каталогот со Брајово писмо „Документи што зборуваат на допир“.
На настанот, како што соопшти Министерството за образование и наука, ќе се обрати министерката Весна Јаневска.
Публикацијата претставува избор на најзначајни документи што се чуваат во депоата на Државниот архив и во неговите подрачни одделенија, при што под секој документ е дадена соодветна легенда на Брајово писмо.
Како што соопштија од Државниот архив, станува збор за проект чија цел е архивското и историското наследство да стане подостапно за лицата со оштетен вид, преку примена на Брајово писмо и инклузивни содржини.
Според организаторите, каталогот претставува придонес кон поголема пристапност на културните и историските вредности и афирмација на еднакви можности во областа на културата и образованието.
Промоцијата ќе се одржи во НУ Музеј на македонската борба за самостојност во Скопје, со почеток во 11 часот, а од Државниот архив посочуваат дека проектот има за цел да ја подигне јавната свест за значењето на инклузивноста во културните институции и зачувувањето на културното наследство достапно за сите граѓани.