Признанието беше доделено на 15 октомври во Брисел, во категоријата „Rising Stars“, во рамките на тематската област „Зајакнување на локалната демократија и инклузијата“. Наградата го препознава пристапот на проектот кон културата и активното учество на локалната заедница. Ако во секое маало важи правилото дека добриот трач далеку се слуша, тогаш приказната за Виолета и Алфредо е најдобар доказ за тоа. Љубовната приказна што ја следеа соседите од своите прозорци и балкони стигна и до европската културна јавност.
- „Да се биде добар граѓанин започнува со тоа да се биде добар комшија. Комшилукот е најмалата, но и најважната граѓанска единица каде што се учевме на солидарност, одржливост и заедништво – вредности кои денес се препознаени на европско ниво, а кај нас се заборавени“, вели Стефан Александар Јовановски, основач на „Комшилук“.
Инспирирана од операта „Травијата“ на Џузепе Верди, оваа интерпретација ја пресели приказната во секојдневието на скопско соседство. Наместо во традиционална оперска сала, дејството се одвиваше меѓу шест станбени згради во Железара. Балконите и прозорците станаа дел од сцената, а публиката се движеше низ маалото следејќи ги трите чина на претставата.
Во оваа верзија, љубовта на Виолета и Алфредо не можеше да остане само нивна работа. Коментарите и озборувањата на соседите станаа дел од дејството, прикажувајќи го влијанието на заедницата врз личните избори. За разлика од трагичниот расплет на оригиналната опера, маалската „Травијата“ заврши со свадба и заедничка прослава.
- „Преку ликовите на Виолета и Алфредо покажавме дека културата има моќ да ја препише реалноста. Го променивме крајот – наместо трагедија, создадовме голема свадбена прослава за целиот комшилук. Токму тоа е суштината на доброто соседство: да славиме заедно и да градиме простор каде што секој се чувствува дел од заедницата“, додава Јовановски.
Во реализацијата на проектот учествуваа околу 150 луѓе, меѓу кои повеќе од 100 локални жители, а изведбата ја проследија приближно 2.000 посетители. Соседите не беа само публика, туку и учесници во културниот настан што се случуваше пред нивните домови.
Фестивалот „Комшилук“ започна пред три години токму во Црвените згради во Железара, а потоа се реализираше и во Шуто Оризари, Побожје, Струга и Битола. Со секое ново издание, иницијативата ја развива идејата дека јавниот простор може да биде место за уметност, а соседите активни учесници во неговото културно оживување.
Наградите „Нов европски Баухаус“ се дел од иницијативата на Европската комисија што ги поврзува одржливоста, инклузивноста и естетиката. Тие препознаваат проекти што придонесуваат за подобар живот во локалните заедници преку нови начини на користење на просторот.
Европското признание отвора можности за понатамошен развој на „Травијата во три чина“. Концептот е замислен како оперска изведба приспособена на конкретен простор, која може да се реализира и во други градови, во соработка со културни организации и театри, притоа задржувајќи ја поврзаноста со локалната заедница.
Со наградата во Брисел, „Комшилук“ покажа дека за силно културно доживување не се секогаш потребни големи сцени. Понекогаш се доволни неколку станбени згради, соседи подготвени да учествуваат и добра приказна што ќе ги поврзе. А кога приказната е добра, очигледно и европските комшии ќе слушнат за неа.