Од 2021 година, групата што ја формирал првоосомничениот кумановец со груби закани и присила изнудувала пари од оштетени лица, искористувајќи ја нивната зависност поради претходни заеми.
„Една оштетена побарала од првоосомничениот 4.000 евра на заем, усно прифаќајќи да ги врати за еден месец со камата од 2.500 евра. Иако во целост му го вратила договорениот износ, тој побарал од неа да ја користи нејзината сметка за преку неа да пушти во оптек пари прибавени со изнуди. Жртвата одбила, а тој почнал да ѝ се заканува, барајќи да го стави нејзиниот автомобил како наводен залог за фиктивни долгови. По налог на осомничениот бил изготвен фиктивен договор за купопродажба на возилото, како да е гаранција за наводен заем. Освен тоа, изготвиле и уште еден фиктивен договор за заем од 1.000.000 денари. На договорите за залог и заем осомничените го фалсификувале потписот на оштетената како заемопримач и без нејзино знаење ги завериле на нотар“, соопшти ОЈО.
Нотарот кој дозволил да се заверат вакви лажни документи е осомничен за несовесно работење во службата и за него до судот е доставен предлог за определување мерки на претпазливост.
Групата осомничени за криминал започнала повторно да ѝ се заканува на оштетената да го предаде возилото и да им го врати наводниот долг. Врз основа на договорите, сопственоста на возилото била променета во корист на еден од осомничените, а потоа оштетената била принудена да им го исплати и наводниот паричен долг.
Друг оштетен во 2021 година, позајмил двапати по 180.000 денари од осомничениот организатор на групата. Иако, ги вратил парите, осомничените продолжиле да му бараат дополнителни исплати како камата и го принудиле да ја користат неговата сметка за да префрлаат големи суми пари од изнуда како формални заеми и да ги извлекуваат во готовина.
МВР вчера вршеше претреси во координација со Основното јавно обвинителство за гонење на организиран криминал и корупција (ОЈО ГОКК), во врска со сомневања за кривични дела „изнуда“, „перење пари и други приноси од казниво дело“ и „несовесно работење во службата“. Беа приведени четири лица.