Пратеникот Љупчо Пренџов е нов заменик на генералниот секретар на ВМРО-ДПМНЕ, Драган Ковачки, откако таквата одлука била усвоена на седницата на Извршниот комитет на партијата.
По повод неговото именување, Пренџов јавно му се заблагодари на претседателот Христијан Мицкоски за укажаната доверба, како и на членовите на Извршниот комитет за дадената поддршка, истакнувајќи дека функцијата ја смета за ново поглавје во својот политички ангажман.
– Му благодарам на претседателот Христијан Мицкоски за укажаната доверба, како и на членовите на Извршниот комитет за поддршката. Ова за мене претставува ново поглавје во политичкиот ангажман, кое го започнувам со јасна определба – довербата да ја оправдам со личен ангажман, доследност и конкретна работа. Продолжуваме со јасна цел, заедничка посветеност и одговорност кон партијата и кон Македонија. Довербата е обврска. Одговорноста е да се оправда со работа и резултати – порача Пренџов.