Во текот на само еден ден, пазарот на благородни метали доживеа вистински потрес. Цената на златото бележи пад од над 12%, додека среброто претрпе уште посилен удар – загуба од речиси 30% во однос на неодамнешните врвови.
Ова е најголемиот еднодневен пад на златото од 1980 година до денес, а за среброто се зборува за најдраматичен ден во последните четири и пол децении.
Главните причини за овој ненадеен колапс се врзуваат со зајакнувањето на американскиот долар по неодамнешните настани во Вашингтон, како и со шпекулациите околу идните одлуки на Федералните резерви и можните промени во монетарната политика.
Инвеститорите, кои во последните месеци масовно се насочуваа кон златото и среброто како заштита од инфлација и геополитичка нестабилност, сега во паника ги распродаваат позициите. Фјучерсите на благородните метали на главните берзи забележаа огромен обем на тргување, а некои аналитичари велат дека станува збор за „класично чистење на долгите позиции“.
Дали ова е само привремен пад или почеток на подолготрајна корекција на пазарот на благородни метали – допрва ќе се види. Сепак, за многумина инвеститори вчерашниот ден ќе остане запишан како еден од најцрните во историјата на златото и среброто.