Државата ја отвори вратата за инвестиции и за извоз на македонските компании во Дубаи. Порастот на БДП, градежништвото, туризмот и земјоделството се добра препорака за арапските инвеститори кои сакаат да ја продлабочат соработката со македонските компании. Во Дубаи има 52 регистрирани компании од Македонија, а трговијата меѓу двете земји во 2024 година достигна вредност од 52,2 милиони долари.
Директорот на Стопанска комора на Дубаи, Мохамед Али Рашед Лута, рече дека има голем потенцијал за соработка во повеќе области и дека преку соработката со Дубаи, македонските компании може да го зголемат својот пораст на глобалните пазари како оние во Африка.
Дубаи, посочи Рашед Лута, нуди бизнис-средина што е поволна за инвеститорите со инфраструктура од светска класа и неспоредлива глобална поврзаност и динамичен дигитален екосистем.
Ги забрзуваме градежништвото, туризмот, земјоделството и значително внимание му посветуваме на извозот на земјоделски производи, рече Мицкоски, оценувајќи дека досега добро оди, но и дека, секако, сè уште има простор за подобрување.
- Засега ја консолидиравме економијата и создадовме добра бизнис-клима. Веќе нема политичари што вршат притисок врз бизнисите и ова е нешто што е многу важно за земјата, имајќи го на ум искуството од минатото, што беше голем проблем за бизнис-заедницата. Мојот прв чекор беше да ги ослободам бизнисите од надворешните политички притисоци и да им дозволам да растат слободно и тоа е нешто што додава вредност на нашата економија досега, изјави Мицкоски.
Официјалните податоци велат дека трговската размена помеѓу Македонија и Дубаи лани изнесувала нешто над 52 милиони евра. Во моментов во Дубаи има регистрирано 52 компании на сопственици од Македонија.