Европската комисија соопшти дека Шенгенските правила нема да се променат, иако претставниците на таа институција се свесни дека одредени категории, вклучувајќи ги и професионалните возачи на камиони, се соочуваат со проблеми при влегување и излегување од европските земји кои се дел од зоната на слободно движење.
Комисијата сугериреа, во исчекување на евентуална промена на Шенгенските правила, да се бара практично решение за професионалните возачи од Западен Балкан преку билатерални договори со земјите-членки на ЕУ, кои би им издале долгорочни визи или дозволи за престој.
Портпаролот на Европската комисија, Маркус Ламерт, изјави дека Брисел е свесен дека одредени категории професионалци од трети земји, поради природата на нивната работа, треба да останат во Шенген зоната подолго од дозволените 90 дена во период од 180 дена.
„Ова ги вклучува професиите што вклучуваат висока мобилност, како што се возачите на камиони, но и спортистите и уметниците на турнеја“, рече Ламерт.
Според него, ова прашање зависи и од националните правила и постојните билатерални договори, поради што постои можност за наоѓање „прагматични решенија“ во рамките на сегашните Шенген правила.
Ламерт ги спомена долгорочните визи и дозволите за престој, кои се одговорност на земјите-членки, како можни опции, додека во некои ограничени случаи, возачите би можеле да се третираат како прекугранични работници.
ЕЕС не воведува нови ограничувања за престој во Шенген
Сепак, Ламерт нагласи дека новиот систем за влез/излез – ЕЕС – не воведува нови ограничувања за престој во Шенген.
„ЕЕС не воведува никакви нови правила или нови барања во врска со должината на кратките престои во Шенген зоната. ЕЕС само овозможува подобра примена на тие правила“, изјави портпаролот на Комисијата.
Правилото дека граѓаните на земјите без виза можат да поминат максимум 90 дена во Шенген зоната во текот на кој било период од 180 дена постоеше пред воведувањето на ЕЕС, но новиот електронски систем овозможува попрецизно евидентирање на влезовите, излезите и должината на престојот.
Комисијата вели дека останува отворена за дискусии за решенија за професионалните возачи, но дека постојните Шенген правила ќе продолжат да важат.
„Продолжуваме да соработуваме со нашите партнери во Западен Балкан“, рече Ламерт, додавајќи дека Комисијата во неколку наврати разговарала и за ова прашање со претставници на транспортниот сектор.
Неколку стотици патни превозници протестираа во понеделник во Сараево, Белград, Подгорица и во Скопско, пред зградите на делегациите на Европската Унија во тие градови.
Превозниците на друмски превоз бараат решавање на прашањето за нивниот престој и работа во ЕУ, имено професионалните возачи да добијат услови за престој прилагодени на спецификите на нивната работа и правилото за 90 дена надвор од 180-те дена да не се однесува на нив.