Иако интересот за електронско банкарство и дигитални плаќања постојано расте, Македонците сè уште значително повеќе се потпираат на готовина отколку на картички и онлајн плаќања.
Според анализата на емисијата „Бизнис Објектив“, во 2025 година граѓаните од банкоматите подигнале 3,6 милијарди евра готовина, што е за дури 53 отсто повеќе од износот што го потрошиле плаќајќи со картички на ПОС-терминали (2,3 милијарди евра).
Податоците на Народната банка покажуваат дека лани за онлајн плаќања се потрошени 470 милиони евра, што претставува значителен пораст во споредба со претходните години.
Директорката на Дирекцијата за платни системи во Народната банка, Билјана Доновска Гечева, изјави дека електронското банкарство бележи забележителен раст:
„Во 2025 година, во однос на 2024 година, кај електронските плаќања има раст од речиси 18% во бројот, а кај вредноста на извршените плаќања дури 28%. Ова е значително повеќе од растот кај плаќањата на шалтер, кој се движи меѓу 1% и 3%. Граѓаните ги препознаваат придобивките – плаќањата се поудобни, полесни, поедноставни, а истовремено сигурни и евтини.“
Таа додаде дека помладите генерации се најактивни во користењето на дигиталните канали, но дека и средната возраст, а се повеќе и повозрасните групи, почнуваат да ги користат.
Сепак, според податоците, разликата меѓу користењето на готовина и картички е најмала кај помладите возрасни групи. На пример, лицата на возраст од 25 до 34 години од банкомати подигнале 509 милиони евра, а со картичка платиле 429 милиони евра. Кај групата од 35 до 44 години, од банкомати се подигнати над 700 милиони евра, а со картичка се платени 620 милиони евра.
Наспроти тоа, повозрасните генерации сè уште значително повеќе се потпираат на готовина. Лицата на возраст од 65 до 74 години од банкомати подигнале речиси двојно повеќе пари отколку што платиле со картичка на продажните места.