Некогашниот премиер Љупчо Георгиевски вторпат во два дена реагира за „северничењето“ на Македонија и на Македонците во Бугарија.
„Реакциите кои ги добив за последниот коментар за името само ја потврдија тезата дека во бугарската јавност постојат сериозен број политички активни луѓе кои многу лесно ги употребуваат имињата ‘Северномакедонец’ и ‘северномакедонски’. Што е однос на омаловажување и навреда.
1. Бугарската официјална политика тврди дека проблемот е само во историјата и ја признава сегашноста. Очигледно, со ваква терминологија, има проблеми со сегашноста. До ветото скоро сите бугарски претседатели и премиери без проблем употребуваа ‘македонски народ’, па и ‘братјата Македонци’?!
2. Проблемот на името и формата на неговата употреба Македонија и Грција го преговараа триесет години, Бугарија сама се исклучи од тие разговори.
3. Со меѓународниот Преспански договор, Грција го доби името Македонија, ние Северна Македонија и правото на придавката ‘македонски’ не во граматичка, туку во политичка смисла. Бугарија и тука ја немаше.
4. Ако целиот гнев на Македонците за името е кон Грција, кој ја тера Бугарија сега да биде адвокат на Грција и да го презема тој гнев на себе.
5. Бугарија за цело време демонстрира двоен стандард за името, историјата и човековите права спрема Грција и Македонија.
6. Меѓу двете држави има доволно стари проблеми за некој да измислува нови“, коментира на Фејсбук лидерот на ВМРО-Народна.