Се почитуваат договорените откупни цени на пиперката „куртовска капија“ кои заеднички ги утврдија министерот за земјоделство, шумарство и водостопанство Цветан Трипуновски и откупувачите на 30 минатиот месец во Струмица.
Пиперката „куртовска капија“ или „ајварка“ се откупува за 45 денари за килограм прва класа, прва и втора 35, втора 20 и за трета 15 денари за килограм, додека екстра класата се откупува за 50-55 денари за килограм.
Според откупувачите, договорените цени максимално се почитуваат и тоа на нивно и задоволство на производителите, а најмногу интерес за македонската куртовска капија има од Србија, Хрватска и Бугарија.
- Откупувачите се придржуваат на договорените откупни цени и тоа е добро и што е најважно понудениот квалитет на пиперката куртовска капија е многу добар и соодветно се селектира според класата. Се надеваме дека таквиот тренд ќе продолжи до крајот на сезоната, велат производители на оваа пиперка.
Откупувачите апелираат до земјоделците да не брзат со бербите и во периодот од 1 до 20 септември да пристапат на берење на договореното производство.
Во споредба со лани откупните цени се зголеми од 13 до 15 отсто, односно цената е зголемена за околу 5 денари за килограм и плус од досегашните 3 производителите ќе добиваат по 4 денари за предаден килограм пиперка на откупните пунктови.
Инаку, годинава се очекува производство на околу 60 до 65 милиони килограми „куртовска капија“.