Првите знаци на штетното влијание на царините врз американската економија веќе се забележливи. Се очекува иницијативите на американскиот претседател Доналд Трамп за создавање нов светски поредок преку воведување низа нови царини да го забават светското стопанство и да ги зголемат тензиите во односите на САД со нивните сојузници и ривали, пренесе Bloomberg Adria.
Трамп и неговиот тим, разбираливо, имаат сосема поинаков поглед на ситуацијата. Тие истакнуваат дека приходите од царините ќе ги надоместат даночните олеснувања кои Конгресот ги продолжи во јуни, а истовремено нагласуваат дека новите инвестиции од компании и државата треба да обезбедат нови работни места.
Фактот што повеќето земји, вклучувајќи ги и членките на ЕУ и Јапонија, прифаќаат почетни договори и не одговараат со воведување повисоки царини дополнително ја потврдува Трампова царинска политика.
Поради своето геополитичко влијание и големината на пазарот, се проценува дека САД ќе продолжат да го поставуваат тонот на меѓународниот систем. Намалената трговија и ефикасноста, повисоката инфлација и зголемената национална самодоверба ќе го карактеризираат системот. Покрај тоа, регионалните групирања – кои произлегуваат од влијанието на големите сили, близината и пониските трговски трошоци – ќе станат релативно поважни средства за трговија. Улогата на доларот постепено ќе се намалува, како во порамнувањата така и како резервна валута. Конечно, растечката група нации на Глобалниот Југ ќе игра клучна улога во новиот трговски систем.
Сегашниот трговски систем е мртов, тврди „Нешнл интрест“. Соединетите Американски Држави повеќе нема да го водат, а ниту една друга нација нема да ја преземе контролата врз него. Тоа остава две можни сценарија: САД ќе се приклучат кон групата демократии (Г7) за да формираат трговски блок или, што е поверојатно, ќе се појави систем базиран на тарифи на кој му недостигаат силни координативни институции.