Премиерот Христијан Мицкоски нагласи дека Владата не е против зголемување на минималната плата, но тоа мора да биде резултат на социјален дијалог и реални економски можности.
- „Нашата цел е посилна економија што отвора нови работни места и обезбедува достоинствен животен стандард. Зголемувањето мора да биде одржливо, а не административно наметнато“, изјави Мицкоски.
Тој додаде дека Владата ќе остане активен партнер во процесот и ќе поддржи решенија што се правични и економски издржани.
- „Верувам дека преку искрен дијалог можеме да обезбедиме подобар стандард за работниците и стабилна деловна клима за работодавачите“, заклучи премиерот.
Министерот за економија Бесар Дурмиши изјави дека инфлацијата во ноември изнесува 0,5%, а на годишно ниво 4%, што укажува на стабилизација на цените. Проекциите се дека следната година инфлацијата ќе падне под 3%.
- „Интервентно зголемување без продуктивност и реални економски параметри ќе создаде притисок врз малите претпријатија и ризик за работните места“, нагласи Дурмиши.
Претседателот на Бизнис конфедерацијата, Миле Бошков, изјави дека до законското усогласување во март има простор за преговори, но енормно зголемување е невозможно.
- „Предлагаме проширување на колективното договарање во Законот за работни односи, со цел да се регулира минималната плата по сектори и да се намалат злоупотребите“, рече Бошков.
Сојузот на синдикати, предводен од Слободан Трендафилов, останува на ставот дека е неопходно зголемување на минималната плата поради растот на животните трошоци.