Здруженијата на транспортни оператори од Македонија,Србија и Босна и Херцеговина издадоа заедничко предупредување дека, доколку не се реши проблемот предизвикан од новиот Entry/Exit System (EES) на Шенген зоната, кој стапува во сила од 10 април 2026 година, ќе дојде до блокада на шенгенските граници.
Новиот систем предвидува биометриска регистрација (отпечатоци од прсти и фотографија) за државјани од трети земји при секој влез и излез од Шенген зоната, со ограничување на 90 дена престој во период од 180 дена. Ова правило, според превозниците, е невозможно да се примени за професионалните возачи на камиони од Србија, Босна и Херцеговина и Македонија.
Неѓо Мандиќ, претседател на Меѓународната транспортна унија, истакна дека возачите ќе имаат само 9 до 10 дена ефективна работа месечно, што е економски неодржливо.
„До 10 април, доколку ништо не се промени, 99,9 отсто од возачите од Србија, Босна и Македонија нема да можат да влезат во ЕУ. Сите камиони ќе запрат, синџирите на снабдување ќе колабираат“ – предупреди Мандиќ.
Тој нагласи дека возачите не се мигранти ниту туристи, туку официјално вработени лица со целосна документација, кои секојдневно преминуваат граници за транспорт на стока. Проблемот е уште поголем поради фактот дека Шенген зоната сега директно граничи со овие земји (Хрватска, Унгарија, Романија, Бугарија).
Мандиќ посочи дека возачите масовно ќе ги напуштаат локалните компании и ќе се вработуваат во ЕУ земји, оставајќи ги превозниците без кадри. Дополнителен проблем се долгите чекања на границите (до три дена), што дополнително го отежнува работењето.
Здруженијата месеци наназад испраќаат писма до Европската комисија, амбасадорите на шенгенските земји и националните власти, но досега немаат добиено задоволителен одговор.
Најавени се протести: доколку до 15 јануари 2026 година нема позитивни чекори од ЕУ, превозниците ќе организираат блокада на товарните терминали на граничните премини, без да го попречуваат патничкиот сообраќај.