Одделот за внатрешна контрола, криминалистички истраги и професионални стандарди при Министерството за внатрешни работи поднесе кривична пријава до Основното јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворската полиција. Пријавата е против А.Б., самостоен инспектор во Одделот за сузбивање на организиран и сериозен криминал, поради основано сомнение за сторено кривично дело „предизвикување општа опасност“, согласно член 288, став 3, во врска со став 1 од Кривичниот законик.
Инцидентот се случил на 30 април 2025 година, околу 10:25 часот, во службена просторија во кругот на Секторот за внатрешни работи Струмица. Според пријавата, А.Б., во присуство на повеќе полициски службеници, по примањето и потпишувањето на решението за отстранување од работното место и по наредба од началникот да го предаде службеното оружје, извадил пиштол од бирото, извршил репетирање и испукал куршум кон вратата на метален сеф во просторијата. Со овој чин, тој предизвикал значителна опасност за животот и безбедноста на присутните.
Покрај кривичната пријава, Одделот за внатрешна контрола ќе поднесе предлог за поведување дисциплинска постапка против А.Б., со мерки што вклучуваат суспензија од работното место до завршување на постапката, одземање на службеното оружје и муницијата, како и задолжителен психијатриски и психолошки преглед.