Хроника

Се јави нов можен старател на фамозните крави од Крива Паланка

Вели дека може да усвои дел од кравите за да се намали притисокот врз граѓаните на Крива Паланка

Понудата на жителот на Кратово кој вчера објави дека е подготвен да згрижи околу 30 крави од стадото што со години слободно се движи низ Крива Паланка и околината, веќе доби продолжение.

Уште едно лице, овојпат од Гостивар, со иницијали Н.К., се нуди да усвои дел од добитокот кој неконтролирано шета низ регионот на Паланка, но и на пошироката територија, вклучувајќи прекугранични подрачја кон Бугарија и Србија.

Н.К. во порака до expres.mk вели дека располага со соодветни услови – штала, пасишта и можност за редовна нега и исхрана – и дека е подготвен да преземе одреден број животни доколку надлежните институции тоа го овозможат.

Според него, ваквите приватни иницијативи можат барем делумно да го намалат притисокот врз граѓаните на Крива Паланка и околните села, кои со години трпат штети од неконтролираното стадо.

Проблемот со над илјада грла крупен добиток што слободно се движат низ Крива Паланка, околните села, нивите, парковите и сообраќајниците веќе подолго време е актуелен и предизвика внимание не само во земјата, туку и во странските медиуми.

Дел од животните се забележани и во прекугранични подрачја, вклучувајќи села во Босилеградско во Србија, додека патот кон Бугарија редовно е изложен на ризик поради нивното движење.

Градоначалникот Сашко Митовски и властите со месеци бараат системско решение и поголема вклученост на државните институции, пред сè на Агенцијата за храна и ветеринарство. Досега се заловени само дел од животните, иако постојат правосилни решенија за одземање.

Понудите како оние на кратовецот Д.П. и гостиварчанецот Н.К. се сметаат за ретки конкретни приватни иницијативи. Дали и во кој обем ќе бидат прифатени, ќе зависи од надлежните институции, кои треба да ги проверат здравствената состојба на животните и условите за чување што ги нудат заинтересираните лица.

Најнови вести од: Хроника

To top