„По повеќедневната напнатост и едноподруги заминувања од Алијансата за Албанците, конечно и Арбен Таравари, лидерот на оваа политичка партија изреагира преку општествената мрежа фејсбук. Паѓа в очи не само емотивниот тон во неговата објава преку фејсбук, туку и неговата неможност да изнесе подлабока политичка анализа на ситуацијата: наместо да го стори ова, тој одбра симболичен и речиси романтичен пристап кон тешката реалност, низ која минува партијата. Но, во политиката заминувањата не се случуваат случајно. Тие секогаш се резултат на погрешно раководење со партијата, поради недостиг на слушање на членството и структурите на партијата!“ – констатира информативниот портал на албански јазик „Инфошќип“ во својата редакциска анализа со наслов „По масовното заминување од Алијансата за Албанците Таравари се предава: „Ние сме победниците во октомври!“
Натаму порталот пишува: Реакцијата на Таравари уследува по по масовното напуштање на АА од страна на истакнати личности и посветени членови на оваа партија, кои јасно се дистанцираа од одлуката на Таравари да ја напушти владата – одлука донесена без внатрешна расправа, без транспарентност и без почитување на партиските структури. Ова донесе не само длабока криза на самодовербата, туку и видлива поделба, што повеќе не може да се крие зад нејасни слогани како „гордо сме посилни од кога било“.
Иронично, наместо да размисли за ситуацијата или да даде нов правец, Таравари одлучи да ја заврши својата реакција со фразата: „Не заборавајте: ние сме победниците во октомври!“, потсетник на поранешната победа, која сега се чини дека е сè подалеку од моментната реалност на партијата која се намалува секој ден.
Вообичаената реторика за „единство“, „сила“ и „гордост“ е во длабока спротивност со реалната слика за поделена структура, исцрпена од внатрешни превирања и раководење без визија. Во политиката минатите победи не се доволни да ги покријат сегашните загуби, особено кога загубите се самонанесени.
Дали ќе може да се возобнови Алијансата за Албанците на Таравари по оваа криза? Или ова е крајот на едно посакувано политичко поглавје, кое сега се затвора со молчење и слогани? Времето ќе покаже, но едно е јасно: во политиката заминувањата не се случуваат случајно. Тие секогаш се резултат на погрешно насочување и недостиг на слушање. – заклучува „Инфошќип“ во својата редакциска анализа.