По повод 40-годишнината од првото емитување на легендарната детска серија „Бушава азбука“, денес во Дебар Маало ќе биде откриен мурал посветен на овој симбол на македонската детска култура. Оваа манифестација го означува почетокот на јубилејната прослава и најавува нови содржини за најмладите, соопштија организаторите.
„‘Бушава азбука’ е многу повеќе од обична емисија – таа е дел од нашето културно наследство што може да се обновува и да се враќа одново. Генерациите што пораснаа со неа сега се родители и гледаат можност преку неа да ги едуцираат и забавуваат своите деца. Јас, практично, остарев со ‘Бушава азбука’ – 40 години се сериозна возраст за телевизиска содржина. Таа можеби не е толку модерна како некогаш, но сè уште е значајна“, изјави режисерот Слободан Унковски.
На настанот ќе биде прикажана и премиерата на шпицата за новата анимирана серија „Буквождер“, која претставува продолжение на „Бушава азбука“. Унковски за „Буквождер“ вели дека е „премостување меѓу минатото и иднината“,м нудејќи нов пристап кон буквите и јазикот.
„Среќен сум што се појавува ‘Буквождер’. Сепак, вистинското продолжение на ‘Бушава азбука’ ќе биде кога ќе се реализира ‘Бушав буквар’, вториот дел, кој веќе го напишаа Горан Стефановски и Маријан Алчевски. Се надевам дека еден ден ќе се развие свест за потребата од ова за да го зачуваме и унапредиме нашиот јазик“, порача Унковски.
Организаторите на прославата нагласуваат дека негувањето и унапредувањето на мајчиниот јазик, како и создавањето квалитетни образовно-забавни програми за новите генерации, се од суштинско значење.