Полната сала на Македонскиот народен театар и аплаузите од публиката вчеравечер го обележаа отворањето на јубилејниот 50. Млад отворен театар со претставата „Лимениот барабан“, според антологиското дело на германскиот нобеловец Гинтер Грас, во режија на Васил Христов и во изведба на Југословенско драмско позориште од Белград.
Македонската публиката вечерва има можност да ја види претставата „Куќата на границата“ на Регионалниот театар од Нови Пазар, дело на Славомир Мрожек, во режија на Андреј Цветановски.
Од вечерва во холот на Младинскиот културен центар (МКЦ) јавноста ќе може да ја погледне уметничката инсталација „Сценариум и имагинариум“ на македонскиот архитект и сценограф Костантин Трпеноски, кој живее и работи во Виена, а кој соработуваше на претставата „Лимениот барабан“ со Христов.
Утревечер ќе биде прикажана претставата на Ѓорѓи Ризески, „Поручникот од Инишмор“, во изведба на Адриана театар од Урошевац, Косово.
Следуваат претставите на Јана Маричиќ – „Коштана“, поставена во Народно позориште во Ниш, Србија, на Ана Батева – „Кучето се засмеа“, која игра во Спам театар во Софија, Бугарија, на Совран Нрецај – „Граница“, ОДА Театар Приштина, Косово, на Искра Шукарова – „Врба“ и на Агнес Нокшиќи – „Слугинки“. Во придружната програма, публиката ќе може да ужива во имерзивниот ВР- перформанс на Нина Николиќ и на Борјан Стојков, со наслов „Ехо од длабочината“, како и во концертите на музичките состави „Звада“ и „Дис ис нот“ од Косово, во рамките на музичката блок-програма на МОТ (21 ноември, 22 ч.).
Фестивалот ќе биде затворен со „Мајката храброст и нејзините деца“ во режија на Дејан Пројковски, а во изведба на Новосадско позориште на 25 ноември.