„Освоените 10 општини се 10 печати на легитимитетот на Вреди како претставник на Албанците!“ – објави на својот фејсбук-профил заменик-директорот на Царината на Македонија Мустафа Даути. Истакнувајќи дека „победата на Вреди е двојна победа за Албанците“, тој алудираше и на поразот на Националната алијанса за интеграција како опозициска коалиција на ДУИ и Али Ахмети на локалните избори. Ова го пренесе информативниот портал на албански јазик „Фол“.
Порталот ја пренесува објавата на Даути на општествената мрежа, кој пишува: „Ова не е само обична изборна победа, туку е епохална промена, јасен доказ дека Албанците во земјата го избраа патот на одговорност, транспарентност и нова визија за управување. За само неколку месеци учество во централната влада Вреди успеа да ја добие довербата на граѓаните со извонредна брзина. Секој глас, даден за оваа коалиција, беше глас на благодарност за нашата работа, посветеност и политичка сериозност. Граѓаните ја видоа промената во стилот на управување, во начинот на комуникација и во приоритетите, што за прв пат го ставија граѓанинот пред партијата.“
Според него, „затоа 10-те добиени општини се 10 печати за легитимитетот, кои го нагласуваат присуството на Вреди како централна и неизбежна сила во албанската политика на Македонија“. „Победата на Албанците е казната што ја доби ДУИ, партија која со години ја држеше апсолутната власт, но ја злоупотребуваше власта. Ароганцијата, немањето самокритика и злоупотребата на довербата на граѓаните им се вратија како бумеранг. Албанскиот народ ѝ даде јасна порака на ДУИ дека моќта не е сопственост, туку одговорност. Ова е пресудата на демократијата: Вреди беше пофалена, а ДУИ беше осудена и казнета.“ – посочи Мустафа Даути.