„Објектите во кои се организира воспитно – образовниот процес, се суштински за неговиот квалитет. Во добри услови и пријатна средина, мотивацијата за учење е поголема и затоа пред две години Владата и општините се обединија околу еден приоритет – да вложиме во инфраструктурата и да го зајакнеме овој столб на образованието. По две години делата се видливи. Ова училиште е резултат на тие заеднички заложби“, рече министерката Јаневска.
Новиот објект има два ката со 30 училници и вкупна површина од 3.128 квадратни метри. Вредноста на инвестицијата е 170 милиони денари.
„Ова е значаен објект уште повеќе затоа што до пред некој година овде постоеја само бараки коишто се оставени тука од времето на земјотресот практично, 50 и повеќе години, децата учеа во супстандардни услови, за разлика од тоа што денес може да го видите, навистина едни европски услови. Е сега останува само тоа да се одржува и да се чува. Остануваат уште некои детали, на пролет да зазелени, оградата да се смени, можеби паркингот за вработените, но и тоа знам дека ќе се заврши бидејќи верувам во работата на градоначалникот – рече Мицкоски, заблагодарувајќи се на сите ангажирани во проектот.
Јаневска потсети дека Владата и Министерството за образование и наука вложуваат подеднакво во сите региони на државата и за две години реализирале 90 проекти во вредност од 70 милиони евра. Половина од средствата се обезбедени преку Министерството за образование и наука и другата половина преку повикот на Владата за финансирање на капитални проекти на општините.