Силното невреме што попладнево го зафати Скопје предизвика и повредени граѓани. На Универзитетската клиника за трауматологија, ортопедски болести, анестезија, реанимација, интензивно лекување и Ургентен центар (ТОАРИЛУЦ) примени се девет повредени лица.
Директорот на Клиниката, проф. д-р Игор Мерџаноски, соопшти дека две лица се здобиле со потешки повреди.
– Една пациентка со повреда на главата е пренесена на Клиниката за неврохирургија, додека друга пациентка е со скршена рака. Останатите повредени се со полесни повреди и се згрижени во Ургентниот центар – изјави Мерџаноски.
Невремето проследено со силен ветер и пороен дожд предизвика паднати дрвја, откорнати кровови, оштетени возила и прекини во снабдувањето со електрична енергија во повеќе делови од главниот град. Надлежните служби и понатаму остануваат на терен и работат на расчистување на последиците.