Веќе пристигнаа првите 30.000 дози вакцини против сезонски грип, а до средината на ноември се очекуваат дополнителни 26.000 дози.
Први што ќе ја примат вакцината ќе бидат високоризичните групи од населението.
Во меѓувреме, во тек е набавката на нови вакцини против туберкулоза од јапонски производител; се очекува наскоро да продолжи вакцинацијата, која беше прекината откако во Хрватска беа регистрирани четири сомнителни случаи на инфекции на коските кај деца, поврзани со вакцината од истиот производител што се користи и кај нас.
Министерот за здравство Сашо Клековски изјави дека се во тек подготовките за испорака и дека пристигнувањето на вакцините е прашање на денови.
„Во тек се логистичките подготовки. Вакцините се набавуваат од централниот магацин на УНИЦЕФ, па се финализираат деталите. Се надевам дека многу наскоро ќе пристигнат во Македонија и дека нема да има проблеми во врска со прекинот или времетраењето на паузата“, рече Клековски.
Прашан кога ќе биде дистрибуцијата на вакцините против сезонски грип до Центрите за јавно здравје, Клековски одговори деновиве ќе се реализира диструбицијата.
-Веќе се информирани Центрите за јавно здравје. Мислам дека овие денови се завршуваат логистиките, ќе бидат дистрибуирани спрема вообичаената формула на дистрибуција-изјави Клековски кој ја посети Клиничка болница-Штип.