Радан Канев, европратеник од Демократска Бугарија се пожали на Фејсбук дека бугарскиот амандман за додавање „модерен“ пред формулацијата „македонски јазик и идентитет“ во извештајот на Европскиот парламент за напредокот на Македонија бил блокиран од европарламентарците од партијата на унгарскиот премиер Виктор Орбан.
„Европратениците на Орбан блокираа амандман во интерес на Бугарија во извештајот за Северна Македонија.
Денес, во Комитетот за надворешни работи на ЕП се одржа гласање за извештајот за напредокот на Република Северна Македонија. Благодарение на напорите на сите бугарски европратеници, а особено на Андреј Ковачев и на Ивајло Валчев, главните групи во ЕП поднесоа усмен амандман што одговара на бугарската национална позиција за извештајот – додавајќи го зборот ‘модерен’ пред формулацијата за македонскиот јазик и идентитет.
Според процедуралните правила на ЕП, ако најмалку пет члена на Комитетот се спротивстават, тие можат да го блокираат гласањето за усмениот амандман.
Па, тие станаа и се спротивставија – тројца од партијата на Орбан и уште тројца антиевропски националисти, поддржани од Орбанистите.
Ништо фатално не се случи – ЕПП ќе го предложи истиот амандман во пленарната сала, а извештајот на ЕП не ја обврзува Бугарија на никаков начин во нејзините позиции во процесот на преговори.
Но, барем Орбан покажа кој е – единствениот јавно прокламиран противник на бугарската национална позиција во Европа. Лидер на партијата што го блокира широкиот консензус во одбрана на бугарскиот интерес и заедничката позиција на ЕУ.
Очекувам сè повеќе бугарски ‘патриоти’ и ‘националисти’, како и шефот на државата и лидерот на ГЕРБ да продолжат да му се додворуваат и да објаснуваат каков пријател на Бугарија е…“, се јадосува Канев.