Главниот штаб при Центарот за управување со кризи донесе нови мерки за справување со проблемот со водоснабдувањето во Гостивар. Македонската армија ги стави во приправност цистерни за техничка вода, а повеќе општини ќе помогнат во нејзината дистрибуција.
Согласно резултатите од анализите на Институтот за јавно здравје, водата во Гостивар моментално е неисправна и за пиење и за техничка употреба. Граѓаните се повикуваат строго да ги почитуваат препораките на надлежните институции и до понатамошно известување да не ја користат водата од водоводната мрежа.
На денешната седница на Главниот штаб, со која претседаваше министерот за внатрешни работи Панче Тошковски, биле разгледани состојбата со водоснабдувањето во Општина Гостивар и биле донесени повеќе заклучоци и мерки за заштита на здравјето на граѓаните.
Главниот штаб ја задолжил Општина Гостивар итно да предложи локации и контакт-лица за воспоставување пунктови за дистрибуција на техничка вода за објектите од витално значење.
Институтот за јавно здравје, ЈП „Водовод“ – Скопје и Агенцијата за храна и ветеринарство ќе продолжат со засилени теренски испитувања на квалитетот на водата, а резултатите редовно ќе ги доставуваат до Главниот штаб.
Македонската армија ги стави во приправност двете цистерни за дистрибуција на техничка вода, кои ќе бидат ангажирани доколку Центарот за управување со кризи процени дека е потребно. Општините Куманово, Тетово, Дебар, Кичево, Кавадарци и Неготино ќе обезбедат техничка вода со свои цистерни за потребите на граѓаните на Гостивар.
Во согласност со одлуката на Владата, Службата за општи и заеднички работи ќе продолжи со дистрибуција на вода за пиење до граѓаните на Општина Гостивар.
Од Центарот за управување со кризи апелираат до сите жители на Гостивар доследно да ги почитуваат препораките и да ги следат официјалните информации што ќе бидат објавувани во текот на денот.