Борецот за правата на Македонците во Бугарија, академик Стојко Стојков, изрази јавна благодарност што се најде меѓу добитниците на годинешната државна награда „23 Октомври“.
„За мене е голема чест, признание и радост одлуката да ми се додели високата државна наградата „23 Октомври“ за книгата Табу, Време на страв и страдање – прогонувањето на Македонците во Бугарија за време на комунизмот (1944 – 1989), што излегува во неколку тома во издание на Матица Македонска.
Со оваа награда не само се наградува мојот долгогодишен труд, но исто така тоа е признание и оддавање почит кон сите Македонци кои поминаа низ комунистичките затвори во Бугарија, страдаа, беа малтретирани и маргинализирани затоа што беа и останаа Македонци.
Согласно чл. 4 од Законот за државни награди: „Со државната награда „23 Октомври“ се оддава највисоко признание за долгогодишни остварувања во областа на науката, културата, образованието, заштитата на државните интереси и промоција на државните приоритети, вредности и културно-историското наследство на Република Македонија.“
Наградата се доделува на 23 октомври во Народното собрание на Македонија, на Денот на македонската револуционерна борба. Имајќи предвид темата, за страдалниците – најсоодветен ден“, објави на Фејсбук копретседателот на ОМО „Илинден“-ПИРИН, професор на Универзитетот „Гоце Делчев“ во Штип и од минатата година член на Македонската академија на науките и уметностите (МАНУ).