Претседателката Гордана Сиљановска- Давкова денеска во вилата „Билјана“ во Охрид на проштална средба ја примила амбасадорката на Хеленската Република во Скопје, Софија Филипиду, информира кабинетот на шефицата на македонската држава на својата веб страница.
Реафирмирајќи го ставот дека регионалната соработка е особено важна за помалите земји, претседателката истакнала дека од Грција очекува да биде меѓу најсилните поддржувачи на патот на македонските ЕУ интеграции.
Според Сиљановска-Давкова, со влезот на земјата и на целиот регион во Унијата, ефективно ќе се затвори постоечкиот геостратешки јаз, а со тоа ќе се постигнат повеќекратни ефекти во Југоисточна Европа, од трговија и инвестициите до енергетската поврзаност.
Од друга страна, како што според објдодаде Сиљановска-Давкова, во рамките на НАТО, двете земји подеднакво се залагаат за одбрана на демократските вредности и одржување на глобалната стабилност.
Во однос на македонско-грчките односи, претседателката и амбасадорката сметаат дека е потребен нов поттик за да се продлабочат и прошират во повеќе области.
За неа, културата е најдобриот лакмус за македонско-грчките односи. Како доказ, ја посочи заедничката изведба на монументалното дело „Кармина Бурана“ од страна на македонската, бугарската и грчката филхармонија, во јуни годинава, како и изведбата на „Митот за Амазонките“ во рамките на фестивалот „Охридско лето“.
Изразувајќи ѝ благодарност на амбасадорката за личниот придонес во соработката, таа ѝ посака добро здравје и успех во нејзиниот иден професионален ангажман.