Советот на Град Скопје ја усвои одлуката со која се воведува ноќна забрана за фрлање смет во контејнерите. Од 22 до 6 часот граѓаните повеќе нема да смеат да изнесуваат отпад, а прекршителите ќе плаќаат казна од 50 евра. Од градските власти велат дека оваа мерка ќе помогне контејнерите да се празнат поефикасно и ќе спречи создавање нови депонии, особено во квартовите каде отпадот често се натрупува околу корпите.
Граѓаните главно реагираат дека ѓубре се фрла и надвор од контејнерите, особено душеци, стакла, мебел. Градот верува дека мерката ќе ја намали нечистотијата околу контејнерите. Првите неколку месеци ќе важат само опомени.
- „Ако се погледне компаративно, во сите поголеми градови времето за фрлање на смет е лимитирано. Ако по 22 часот се полнат садовите нормално е дека цела вечер и целиот нареден ден корпите за отпад ќе бидат полни, бидејќи не се празнат преку целиот ден. Не може кога постои голема гужва во градот да се чисти и да се собира смет,“ велат од Град Скопје.
Од Градот објаснуваат дека оваа мерка им дава правена основа на инспекторите да санкционираат физички и правни лица што нема да го почитуваат терминот за одлагање отпад.
Претседателот на Советот, Даме Димитровски, објасни дека мерката се носи по примерите од големи светски метрополи.
- Ваквата практика јас сум ја сретнал во Истанбул и беше ограничена на 15 минути пред 5 часот кога смеете да фрлите ѓубре. Во Токио, исто така, има точно определено време за секој камион и вид отпад. Се надевам дека оваа практика ќе биде уште подобра кога ќе бидат воведени и различни корпи за селекција – изјави Димитровски.
Градот најавува дека воведувањето селективни корпи ќе биде следната фаза од реформите во управувањето со отпадот.